Avokati i Popullit ka reaguar pas ngjarjes në burgun e Durrësit, ku i burgosuri Roland Hasani i dha fund jetës së tij, duke u vetëvarur në qeli.
Në reagim, Avokati i Popullit iu bën thirrje institucioneve shqiptare që të marrin masat e nevojshme për të garantuar jetën e personave që vuajnë dënimin, por edhe ndihmën psikologjike apo shëndetësore që këto ngjarje të mos ndodhin.
“Avokati i Popullit është njohur nëpërmjet medias lidhur me një ngjarje e rëndë të ndodhur brenda njërës prej qelive të burgut të Durrësit. Sipas raportimeve, në ambientet e brendshme të këtij institucioni, një i burgosur ka varur veten. Një ekip i Avokatit të Popullit i përbërë nga Komisioneri dhe Ndihmës komisionerë të Mekanizmit Kombëtar për Parandalimin e Torturës menjëherë pas marrjes dijeni të ngjarjes po verifikojnë ne vend ngjarjen. Nisur nga kjo ngjarje Avokati i Popullit, për herë të disatë sjell në vëmendje të autoriteteve nevojën e marrjes së masave të menjëhershme dhe energjike për përmirësimin e kushteve pranë institucioneve penitenciare IEVP në përputhje me angazhimet e shtetit shqiptar pranë organizmave ndërkombëtarë si dhe në zbatim të akteve ligjore kombëtare e ndërkombëtare. Avokati i Popullit nënvizon që rekomandimet e përpiluara prej tij drejtuar institucioneve të shtetit shqiptar, nuk kanë qëllim tjetër përveçse përputhjen e standardeve faktike me angazhimet e marra nga shteti shqiptar në garantimin e jetës dhe të drejtave të qytetarëve të cilëve u është privuar liria. Avokati i Popullit u bën thirrje institucioneve shqiptare të marrin masat e nevojshme për të garantuar jetën e personave që vuajnë dënimin por edhe ndihmën psikologjike apo shëndetësore që këto ngjarje të mos ndodhin.”
44-vjeçari, i cili vuante prej disa kohësh nga probleme të shëndetit mendor, ishte i dënuar me 14 vite burg për vrasje.