Ish drejtori i burgjeve dhe ish deputet i PS-së, Arben Çuko është liruar nga arresti i shtëpisë pas një vendimi të marrë sot nga Gjykata e Krimeve të Rënda, e cila masën ia ka ndryshuar në “detyrim paraqitje”.
Më 16 korrik dosja e Çukos u kthye nga gjykata për plotësim hetimesh pasi sipas saj kishte mangësi në drejtim të provave.
Arben Çuko u arrestua disa muaj më parë në kuadër të operacionit “VOL-VO4”, pasi emri i tij doli në përgjimet e grupit “Avdylaj”, pjesë e dosjes së famshme 339.
Në këto përgjime Çuko u zbulua se favorizoi një të dënuar për të lëvizur nga një burg në një tjetër. Gjithashtu Arben Çuko u akuzua edhe për korrupsion, pasi shoferi i tij dyshohet se kishte marrë një shumë parash për të lehtësuar kushtet e një të dënuari.