Kastrioti nga Lezha u bë viral në rrjetet sociale për shkak se i kërkoi kryeministrit Edi Rama gruan, të cilën e kishin çuar në hotel për tu strehuar.
Gruaja ishte zhvendosur në një hotel në Golem me fëmijët, por Kastrioti nuk dinte shumë për këtë teksa shfaqej i hutuar para kryeministrit. Në një tragjedi të tillë, drama e të prekurve nga tërmeti është e madhe. Por Kastrioti ka një histori tragjike.
Mësohet se ai ka humbur vëllanë dhe nipin tre muaj më parë, të cilët ishin mbytur në pus.
Newsbomb ka zbuluar historinë e tij ku shkruan se djali i vogël i tij është me aftësi ndryshe dhe kishte marrë trajtim në qendrën e zhvillimit ditor në Lezhë.
Gruas së tij, i ka rënë për barrë që të kujdeset për dy burra me aftësi të kufizuara, Kastriotin dhe djalin e vogël.
Kastrioti dukej i traumatizuar dhe tepër i shqetësuar.
Ai kishte dëgjuar se një grup personash që u ishin shkatërruar banesat nga tërmeti, ishin zhvendosur në Golem.
Kastrioti nuk ka as para për të shkuar atje ku ndodhet bashkëshortja dhe as të njohur për ta shoqëruar.
I deportuar nga Franca pasi nuk siguroi dot azilin, Kastrioti u kthye në fshatin e tij në Torrovicë të Lezhës.
Në pusin e shtëpisë, humbën jetën në shtator vëllai dhe nipi i tij, të cilët u gjetën të asfiksuar.
Kastrioti qëndronte në bulevardin “Gjergj Fishta” të Lezhës me shpresën se do të gjente ndonjë punë për të siguruar para për t’u ushqyer.
Motra dhe kunata e tij ndodheshin në Durrës dhe kishin si synim ta merrnin afër.
Mirëpo tërmeti i 26 nëntorit nuk i la kohë askujt të mendohej dhe bashkëshortja e Kastriotit merr fëmijët dhe zhvendoset në Golem.
Ndërsa ishte i shqetësuar për fatin e gruas dhe dy fëmijëve të tij, Kastrioti përballet edhe me përqeshjet e turmës.
Video pasi u bë virale tashmë u harrua, por halli i Kastriotit i cili kërkon gruan dhe fëmijët, akoma jo.