Fatos Klosi, i është përgjigjur akuzës së ish-kryeministrit Sali Berisha, i cili një natë më parë tha se ish-kreu i SHISH ka qenë personi që ka nxjerrë në pritë Azem Hajdarin. Klosi e mohoi këtë gjë dhe shtoi se edhe nëse do ta kishte bërë, fajtor do të ishte Fatos Nano, pasi ai vetë ishte thjesht një vartës.
“Habitem me median që i japin mundësi të flasë dhe nuk i hyn gjemb në këmbë prej 22 vitesh. Nuk i kishte Hajdari asnjë hesap qeverisë. I persekutuari kryesor në këto deklarata është Fatos Nano, jo unë, nëse unë do të bëja diçka të tillë, do të kisha miratimin dhe me urdhërin e Nanos. Nëse do kisha bërë vrasjen e një deputeti, urdhërin do ta kisha marrë nga Fatos Nano dhe ai do të ishte vrasësi,”– tha Klosi.
Berisha akuzoi një natë më parë Klosin se ai ishte personi që e kishte nxjerrë në pritë Azem Hajdarin. Madjes, sipas Berishës, ai që bën atentatin ka dhe dijeni dhe shtoi se Klosi ishte mes atyre që e vranë.