Ish-drejtori i Burgjeve, Agim Ismaili, është paraqitur paraditen e sotme në Gjykatën e Posaçme, ku do të mbahet seanca paraprake.
Ismaili është marrë i pandehur si anëtar i grupit kriminal për hakerimin e SPAK-ut.
Ai akuzohet për veprat penale “Përgjimi i paligjshëm i të dhënave kompjuterike”, të kryer në formën e posaçme të bashkëpunimit, atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”.
Kujtojmë se në janar, SPAK mbylli hetimet dhe dërgoi për gjykim Ismailin, ish-punonjësin e IMT-së, Arnold Rrokajn dhe ish-zyrtarin e burgut të Vlorës, Zambak Gjonin.
Në njoftimin e SPAK-ut, thuhej se Arnold Rrokaj aksesoi në mënyrë të paautorizuar materiale hetimore të SPAK-ut, një pjesë e të cilave u dërguan në mënyrë të paligjshme te Zambak Gjoni dhe Agim Ismaili. Këta dy të fundit i kanë shpërndarë më pas materialet te persona të tretë.