Një person i shpallur në kërkim nga drejtësia është vetëdorëzuar në polici, pasi akuzohet se ka qenë pjesë e një grupi të strukturuar kriminal të përfshirë në trafik ndërkombëtar droge.
Arrestimi i tij u krye në zbatim të masës së sigurisë “arrest në burg”, të caktuar në mungesë nga Gjykata e Posaçme kundër Korrupsionit dhe Krimit të Organizuar.
Sipas hetimeve të SPAK, personi me iniciale N.SH dyshohet se ka qenë pjesë e një organizate kriminale që ka vepruar gjatë viteve 2020-2021 dhe që akuzohet për trafikimin e rreth 8.1 tonëve lëndë narkotike, kryesisht kokainë dhe kanabis.
Sipas Prokurorisë së Posaçme, droga trafikohej nga vende si Brazili, Ekuadori, Kolumbia, Spanja dhe Maroku, me destinacion disa shtete evropiane, përfshirë Italinë, Belgjikën, Holandën dhe Spanjën.
Hetimet për këtë grup kriminal vijojnë, ndërsa autoritetet po punojnë për identifikimin dhe arrestimin e personave të tjerë të dyshuar si të përfshirë në aktivitetin kriminal.