I shumëkërkuar nga Policia e Shtetit, por edhe nga familja. Të afërmit e Ervis Martinajt kanë kallëzuar në Policinë e Kurbinit humbjen e kontakteve me të. Kallëzimi është bërë ditën e djeshme nga Faik Martinaj, xhaxhai i 40 vjeçarit.
Xhaxhai pretendon se ka 3 ditë që nuk ka asnjë kontakt me nipin e tij, ndonëse Ervis Martinaj është për momentin një prej njerëzve më të kërkuar nga policia shqiptare.
Është ngritur një grup i posaçëm nga uniformat blu për ta sqaruar më tej situatën. Ky denoncim i familjarëve të Martinajt, vjen pas disa vrasjeve të ndodhur në zonën e Fushë-Krujës ku target ishin njerëzit e Ervis Martinajt.
Martinaj është në kërkim pasi sipas dëshmisë së të penduarit të drejtësisë Nuredin Dumani, ai kishte urdhëruar vrasjen e Endrit Dokles, atentat që nuk u realizua.