Gjatë natës që lamë pas, punonjësit të SHISH, Alfred Karajt i vendosën tritol në banesën e tij në Burrel.
Siç shihet nga pamjet, banesa e punonjësit të SHISH është rrethuar nga policia, e cila vijon hetimet për zbardhjen e shkaqeve të shpërthimit.
Në momentin e shpërthimit Karaj dhe familja e tij nuk ndodheshin në banesë, ndaj dhe fatmirësisht nga shpërthimi ka pasur vetëm dëme materiale.
Shpërthimi ka qenë i fortë dhe ka krijuar panik te banorët e një pallati në bllokun e banimit të quajtur “Katrori”, ku janë thyer edhe xhamat e disa banesave të pallatit.
Vetë punonjësi i SHISH, Alfred Karaj, e lidh ngjarjen me detyrën, pasi shprehet se nuk ka pasur konflikte të tjera. Gjithashtu, nga Tirana kanë mbërritur edhe forcat anti-eksploziv për të asistuar në zbardhjen e ngjarjes dhe zbulimin e lëndës plasëse apo sasinë që ishte vendosur.