Ngjarja e vrasjes së 40-vjeçarit Hekuran Billa duket se tashmë ka një autor. Sipas News 24, mësohet se autori është identifikuar dhe është shpallur në kërkim, ndërkohë që pritet njoftimi zyrtar i policisë.
Billa mbeti i vrarë në mjetin e tij gjatë një atentati në zonën e Komunës së Parisit në Tiranë.
Nga breshëritë e plumbave Hekuran Billa mori plagë në kokë dhe në trup, duke ndërruar jetë menjëherë.
Hekuran Billa jetonte në fshatin Domje, ndërsa në zonën e Komunës së Parisit kishte takuar disa miq të tij, por edhe të motrën. Motivet e ekzekutimit janë ende të paqarta, por dyshimi kryesor për hetuesit mbetet hakmarrja për shkak të së kaluarës së tij.
Kohët e fundit 40-vjeçari kishte hapur edhe një biznes të tijin në Tiranë për dhënien e makinave me qira. Policia nuk ka shumë prova apo të dhëna për vrasësit, ndërsa automjeti dhe targat e përdorura në ekzekutimin mafioz kanë rezultuar të vjedhura.