Në mbledhjen e kësaj të hëne, Gjykata e Lartë ka zgjedhur Ilir Toskën me 13 vota, për të qenë anëtari i 8-të në Gjykatën Kushtetuese. “Ky vendim i njoftohet menjëherë, Kryetarit të Kuvendit, Presidentit të Republikës, Kryetarit të Gjykatës Kushtetuese dhe i dërgohet për botim Qendrës së Publikimeve Zyrtare”.
Rreth një muaj më parë Këshilli i Emërimeve në Drejtësi i dërgoi Gjykatës së Lartë listën me tre kandidatët për plotësimin e vakancave në Kushtetuese. Pas kontrollit të kryer nga KED, në listë i pari u rendit Toska, duke u vlerëuar me 85.44 pikë.
Kushtetuesja duhet të ketë 9 gjyqtarë, 3 të emëruar nga Presidenti i Republikës, 3 nga Kuvendi dhe 3 nga Gjykata e Lartë. Gjyqtarët qëndrojnë në detyrë për 9 vjet, pa të drejtë riemërimi.
Lista e anëtarëve të Gjykatës Kushtetuese
- Dr. Vitore Tusha, Kryetare
- Marsida Xhaferllari, anëtare
- Dr. Fiona Papajorgji, anëtare
- Dr. Elsa Toska, anëtare
- Altin Binaj, anëtar
- Sonila Bejtja, anëtare
- Dr. Sandër Beci, anëtar
- Ilir Toska, anëtar
Njoftimi i plotë nga Gjykata e Lartë
Bazuar në nenin 125, pika 1 të Kushtetutës, nenin 7/ç të ligjit nr. 8577, datë 10.2.2000 “ Për organizimin dhe funksionimin e Gjykatës Kushtetuese të Republikës së Shqipërisë”, te ndryshuar, si dhe Rregullores së miratuar nga Mbledhja e Përgjithshme e Gjyqtarëve të Gjykatës së Lartë, “Për zgjedhjen e anëtarit të Gjykatës Kushtetuese”, sot në datë 12 shtator 2022, ora 10.00, Mbledhja e Posaçme e gjyqtarëve të Gjykatës së Lartë zhvilloi procedurën e votimit për zgjedhjen e anëtarit të Gjykatës Kushtetuese, bazuar në listën e dërguar për këtë qëllim nga Këshilli i Emërimeve në Drejtësi.
Në përfundim të procesit të votimit, komisioni renditi të parin z. Ilir Toska me 13 (trembëdhjetë) vota. Në këto kushte, z. Ilir Toska zgjidhet anëtar i Gjykatës Kushtetuese.
Ky vendim i njoftohet menjëherë, Kryetarit të Kuvendit, Presidentit të Republikës, Kryetarit të Gjykatës Kushtetuese dhe i dërgohet për botim Qendrës së Publikimeve Zyrtare.