Irani po konsideron një sulm gjatë Kupës së Botës, për të tërhequr vëmendjen nga protestat në vend që kanë vrarë më shumë se 350 njerëz, ka pohuar shefi i inteligjencës izraelite. Gjeneralmajor Aharon Haliva paralajmëroi se Teherani mund të nisë një sulm ndaj turneut të futbollit në Katar për të krijuar destabilitet në rajon.
Kreu i inteligjencës ushtarake të Izraelit shtoi se qëllimi do të ishte largimi i fokusit nga protestat mbarëkombëtare në Iran dhe përqëndrimi i fokusit tek një sulm gjatë Kupës së Botës. Paralajmërimi i tij vjen ndërsa protestat e përhapura vazhdojnë të tronditin Republikën Islamike. Protestat nisën pas vdekjes së një 22-vjeçareje në paraburgimin e policisë. Mahsa Amini vdiq tre ditë pas arrestimit të saj në Teheran për shkeljen e dyshuar të kodit islam të veshjes për gratë.
Haliva tha se ndërsa trazirat publike rriten, Irani ka të ngjarë të jetë ‘shumë më agresiv’ në përgjigjen e tij.
“Po ju them se iranianët tani po mendojnë të sulmojnë edhe Kupën e Botës në Katar”, tha Haliva në një konferencë të Institutit për Studime të Sigurisë Kombëtare në Tel Aviv.
“Irani po kërkon të ruajë destabilitetin si një gjë konstante, në një kohë kur bota rreth tij është e qëndrueshme dhe lulëzon”, tha Haliva, sipas The Times of Israel.
“Kupa e Botës ka të ngjarë të jetë një nga ato ngjarje në të cilat ata do të përpiqen të krijojnë destabilitet,” shtoi ai.
Lëvizja e protestës mbarëkombëtare fillimisht u përqendrua në hixhabin e mandatuar nga shteti i Iranit, ose shaminë, për gratë, por shpejt u shndërrua në thirrje për rrëzimin e klerikëve shiitë në majën e pushtetit të vendit. Haliva shtoi se ka ‘shqetësim të vërtetë’ brenda Iranit se trazirat ‘rrezikojnë’ regjimin.
“Në këtë fazë, unë nuk shoh një rrezik për regjimin, por ndërsa presioni mbi Iranin rritet, duke përfshirë presionin e brendshëm, përgjigja iraniane do të jetë shumë më agresive, kështu që ne duhet të presim një përgjigje të tillë në rajon dhe në botë”, përfundoi ai.