Për ish ministrin e Drejtësisë Ylli Manjani zgjidhja e krizës politike në vend duhet të vijë nga vetë ne, dhe jo ndërmjetësime ndërkombëtare. Duket si një përgjigje e tij ndaj vizitës së Matthevv Palmer, zëvendësndihmëssekretari i Shtetit për Europën, apo edhe deklaratës së sekretarit të përgjithshëm të OSBE-së, Thomas Greminger.
Për Manjanin e gjithë zgjidhja vjen nëpërmjet një mocioni mesbesimi të kryeministrit.
Sipas tij, kryeministri provokon zgjedhje të parakohshme nëpërmjet një mocioni besimi sipas nenit 104 të Kushtetutës, që e çon vendin në zgjedhje. “E vetmja gjë që kërkon një mirkuptim është kur do jenë zgjedhjet. Më e arsyeshme është që të bëhen në vjeshtë së bashku me zgjedhjet vendore, të cilat në kushtet aktuale nuk mund të mbahen”, thotë Manjani në një postim në Facebook.
Lexo edhe: A do të marrë fund kriza politike? Zyrtari amerikan mbërrin sot në Tiranë
POSTIMI I YLLI MANJANIT
Ende shpresoj që kriza jonë politike, që ka vënë seriozisht në rrezik demokracinë, të zgjidhet nga vetë ne.
Është krejt e thjeshtë: Kryeministri provokon zgjedhje të parakohshme nëpërmjet një mocioni besimi sipas nenit 104 të Kushtetutës.
Kaq duhet! As ndërmjetësim ndërkombëtar (të cilët s’kanë haber nga punët tona) e as tryeza pazaresh.
Thjesht një mocion besimi “i dështuar” e çon vendin në zgjedhje. Nga zgjedhjet dhe vetëm nga zgjedhjet do dalë parlamenti pluralist nga ku fillon të veprojë sistemi demokratik.
E vetmja gjë që kërkon një mirkuptim është kur do jenë zgjedhjet. Më e arsyeshme është që të bëhen në vjeshtë së bashku me zgjedhjet vendore, të cilat në kushtet aktuale nuk mund të mbahen.
Vetëm për kaq nuk mendoj se ka nevojë për cirk ndërkombëtar…