Duke mbajtur një kallashnikov në dorë, ish-presidenti ukrainas Petro Poroshenko ka dalë sot në rrugët e Kievit duke u shprehur i vendosur se do mbrojë vendin e tij. Duke folur për CNN, ai tha se të gjithë ukrainasit janë gati për të mbrojtur vendin e tyre.
“Të gjithë duhet të kuptojnë se Putin shpalli një luftë jo për Ukrainën. Putin i shpalli luftë të gjithë botës”, u shpreh Poroshenko.
Më tej ish-presidenti deklaroi se Ukraina ka nevojë për ndihmën e perëndimitt, duke përfshirë sanksionet, largimin e Rusisë nga SWIFT (një rrjet mesazhesh të sigurisë së lartë që lidh mijëra institucione financiare në mbarë botën) dhe bllokimin e avionëve dhe anijeve ruse në portet e BE-së dhe NATO-s.
Më tej, ai gjeti rastin të falenderojë Shtetet e Bashkuara dhe Mbretërinë e Bashkuar për sigurimin e armëve mbrojtëse.
“Kjo është e rëndësishme për ne që të ndjejmë se nuk jemi vetëm, se ju jeni bashkë me ne”, tha ai.
Ish-presidenti tha se Putin nuk do ta pushtojë kurrë Ukrainën. Madje, ai e cilësoi Putin si “një të çmendur”.
“Pavarësisht se sa ushtarë vret, sa raketa ka, sa armë bërthamore ka, ne ukrainasit jemi njerëz të lirë me një të ardhme të madhe evropiane,” theksoi ai.