Gjykata Kundër Korrupsionit dhe Krimit të Organizuar ka shuar masën “arrest me burg” ndaj ish-zëvendësministres së Brendshme, Rovena Voda, e cila u dënua me 10 muaj burg për korrupsion. Pas vendimit të fundit, Voda u shpreh se ka humbur një betejë, por lufta për të vazhdon ende.
Voda u shpall fajtore se kishte pranuar vlera monetare për të ndikuar në punësimin e Beut në ministri. Referuar hetimit të Prokurorisë së Posaçme, mes Vodës, Beut dhe Majlinda Hasanit janë realizuar tre takime në shkurt-mars 2020 në Ministrinë e Brendshme dhe në Durrës.
Ato janë përgjuar teksa flasin për dhënien e një zarfi me 1 mijë euro Vodës dhe janë filmuar në një bar në Durrës, teksa i japin zv.ministres një aparat celular. Lidhur me episodin e tretë, SPAK thotë se Voda ka shkuar në port me automjetin e Ministrisë së Brendshme që mbante si zyrtare e lartë dhe shoferin e saj për të marrë një arkë me peshk.