Një 46 vjeçar është vetëvarur në bllokun e sigurisë pasi ishte ndaluar për vjedhje. Sipas policisë, ngjarja e rëndë ka ndodhur rreth orës 01:20 në dhomën nr. 8 të bllokut të sigurisë, ku 46 vjeçari nga Berati është konstatuar i vetëvarur me një copë rrobe (pjesë tutash) në dritaren e dhomës.
Në njoftimin e policisë thuhet se, nga veprimet e kryera, rezulton se rreth orës 00:50 punonjësi i shërbimit ka kryer kontroll rutinë dhe 46 vjeçari nuk ka shfaqur probleme apo shqetësime. Rreth orës 01:20, gjatë kontrollit të radhës, punonjësi i policisë ka konstatuar të ndaluarin të varur në rrjetën e dritares së dhomës dhe ka ndërhyrë menjëherë duke kërkuar ndihmë edhe nga punonjësit e tjerë.
Në përpjekje për ta mbajtur të ndaluarin të ngritur, njëri nga punonjësit ka prerë rrobën me të cilën ishte vetëvarur dhe është njoftuar menjëherë urgjenca. Shërbimi mjekësor ka mbërritur menjëherë në vend, ku ka konstatuar se i ndaluari kishte ndërruar jetë.
Sipas policisë, 46 vjeçari kishte deklaruar se ishte përdorues i lëndëve narkotike dhe pas vizitës në shërbimin e toksikologjisë, mjekët nuk kishin përcaktuar dozë metadoni, pasi dhe nga kontakti me qendrën “Aksion Plus”, është konfirmuar se ai nuk figuronte i regjistruar si përdorues metadoni. Në rekomandimin mjekësor të lëshuar nga mjeku i bllokut të sigurisë, ishte vendosur qetësuesi Xanax, i cili i është dhënë të ndaluarit sipas këtij rekomandimi.
Veprimet hetimore për rastin, nën drejtimin e Prokurorisë, do të kryhen nga Drejtoria e AMP Tiranë.