Bashkia e Kamzës njihet për vendosjen e emrave të veçantë të rrugëve, por së fundmi në nder të 100-vjetorit të vdekjes së Ismail Qemalit, një prej rrugëve do të mbajë dhe emrin e tij.
Kreu i shtetit Ilir Meta ka marrë pjesë në ceremoninë e emrit të rrugës. Në një postim në Facebook ai shkruan se vepra e Ismail Qemalit në shërbim të çështjes shqiptare meriton të gjithë nderimin e respektin e pakufijshëm.
“Me rastin e 100-vjetorit të kalimit në përjetësi të patriotit të madh, burrit të ndritur dhe themeluesit të shtetit të ri shqiptar, Ismail Qemali, u ndjeva sot jashtëzakonisht i lumtur të merrja pjesë në ceremoninë e vendosjes së emrit të tij në një prej rrugëve kryesore të Bashkisë Kamzë. Vepra e përjetshme e Ismail Qemalit në shërbim të çështjes shqiptare, forcimit të identitetit kombëtar dhe themelimit të shtetit modern, meriton të gjithë nderimin e respektin tonë të pakufijshëm, si komb, shoqëri dhe institucione”, shkruan Meta.