Vizitorët dhe turistët hebrenj nuk do të lejohen të hyjnë në kompleksin e Xhamisë Al-Aksa në Jerusalem deri në fund të muajit të shenjtë mysliman të Ramazanit , sipas një deklarate të lëshuar nga zyra e kryeministrit izraelit Benjamin Netanyahu.
Bastisja e policisë izraelite në vend javën e kaluar shkaktoi sulme me raketa ndaj Izraelit nga Rripi i Gazës, Libani dhe Siria. Izraeli u përgjigj me sulme ushtarake.
Në vitet e mëparshme, Izraeli i ndaloi hebrenjtë të vizitonin këtë kompleks gjatë 10 ditëve të fundit të Ramazanit.
Deklarata e kryeministrit izraelit tha se, pas një takimi sigurie, vizitat e hebrenjve në vendin e shenjtë, të njohur si Mali i Tempullit për hebrenjtë, do të pezullohen deri në fund të Ramazanit rreth 20 prillit.
Ministri i Sigurisë Kombëtare i ekstremit të djathtë të Izraelit, Itamar Ben Gvir e dënoi vendimin. ” Kur terrorizmi godet , ne duhet të kundërpërgjigjemi me forcë të madhe, të mos dorëzohemi para tekave të tij,” tha ai në një deklaratë.
Më herët gjatë ditës së sotme, ushtria izraelite qëlloi dhe vrau dy persona të armatosur palestinezë që kishin hapur zjarr ndaj një poste ushtarake pranë një vendbanimi hebre në pjesën veriore të Bregut Perëndimor të pushtuar.
Ushtria njoftoi gjithashtu se dy pushkë M-16 dhe një pistoletë u gjetën gjatë kërkimit për të dyshuar të tjerë në vendngjarje. Tensionet janë rritur në Bregun Perëndimor të pushtuar prej muajsh, me shumë përplasje mes izraelitëve dhe palestinezëve.