Kryeministri i Maqedonisë së Veriut, Dimitar Kovaçevski dhe zv/kryeministri Artan Grubi paralajmërojnë zhvendosjen e kufirit nga Qafë Thana në Ladorishtë. Për rrjedhojë, rruga nga Maqedonia për në Shqipëri do të shkurtohej për 20km.
“Ne tani për momentin me Ministrin për Transportin dhe kolegun e tij nga Shqipëria po punojmë në zhvendosjen e pikës kufitare me Shqipërinë sepse kufiri aktual është i vendosur në një lartësi mbidetare 780 metër”, tha Kryeministri Kovaçevski.
Ndërkohë, zv/kryeministri shqiptar i Maqedonisë së Veriut, Artan Grubi gjatë një vizite në autostradën Kërçovë-Ohër, ka përmendur memorandumin që është firmosur në Shqipëri në fundit të vitit 2022.
Duke qenë se dogana do zbresë nga Qafë Thana në Ladorisht, një fshat në Maqedoni, edhe në anën shqiptare kufiri do të zbresë në fshatin Qukës, pa shkuar në Prrenjas.
“Ideja e fundit që e paraqitëm dhe nënshkruam memorandum pikërisht para vitit ri me kryeministrin Rama dhe zv/kryeministren Belinda Balluku në Shqipëri është ta ndryshojmë vendkalimin kufitar, të mos jetë kufiri më në Qafë Thanë për arsye të lartësisë por ta zbresim më poshtë në fshatin Ladorishtë duke e lidhur me fshatin Qukës në Shqipëri me ç’rast mund të shkurtohet rruga prej 15 deri në 20km”, tha Artan Grubi.