Xhaxhai i kërkuarit nga Policia, Ervis Martinaj, pretendon se vetë nuk ka pasur asnjë komunikim me nipin e tij. Në denoncimin që Faik Martinaj ka bërë në Komisariatin e Policisë së Kurbinit, pretendon se e ka njoftuar një njëri nga Puka për zhdukjen e nipit, madje dhe i është shfaqur i shqetësuar se mikut të tij mund t’i kishte ndodhur ndonjë gjë e keqe.
“Në lidhje me nipin tim, djalin e vëllait Ervis Martinaj, i cili është shpallur në kërkim nga prokuroria e posaçme kundër krimit dje rreth orës 22:00, jemi njoftuar nga një i afërmi jonë, që për arsye sigurie nuk dua të përmend emrin, i cili nuk ndodhet në Shqipëri, por është nga Puka dhe më ka vënë në dijeni se Ervisi është zhdukur dhe nuk kishte kontakte me të.
Dua të theksoj se që prej kohës që nipi Ervisi është shpallur në kërkim nuk kam patur asnjë kontakt të drejtperdrejtë apo në telefon, por vetëm nëpërmjet personave të afërm. Kemi dyshime se Ervisit mund ti ketë ndodhur diçka e keqe nga grupe kriminale që kërkojnë ta eliminojnë”.