Çështja për kryebashkiakun e Kuçovës, Kreshnik Hajdari ka kaluar për gjykim në Gjykatën e Posaçme. Sipas gazetares Glidona Daci, ai do të gjykohet me procedurën e gjykimit të shkurtuar, që do të thotë se nëse shpallet fajtor do të përfitojë ulje me 1/3 e dënimit.
SPAK i mbylli hetimet dhe dorëzoi në gjykatë kërkesën për ta marrë Hajdarin të pandehur në Dhjetor të vitit që lamë pas. Ai akuzohet për falsifikim të formularëve të dekriminalizimit, pasi referuar hetimeve nuk ka deklaruar në dy raste një dënim në shtetin grek.
SPAK-u thotë se autoritetet greke kanë konfirmuar se Hajdari është dënuar me masë riedukuese nga Gjykata e Janinës për kalim të paligjshëm të kufirit. Hajdari ka mohuar më herët akuzat duke pretenduar se nuk ka dijeni.