Kryesuesi i seancës konstituive të Kuvendit të Kosovës, Avni Dehari, ka nisur punimet e seancës, duke ftuar kryetarin e Lëvizjes Vetëvendosje, Albin Kurti, të paraqesë propozimin për kryetar të Kuvendit.
Në fjalën e tij, Kurti tha se takimet dhe komunikimi i tij, në cilësinë e kryeministrit në detyrë dhe kryetarit të Vetëvendosjes, kanë vijuar, por deri më tani nuk është arritur një marrëveshje.
“Takimet dhe komunikimi i imi si kryeministër në detyrë dhe kryetar i Vetëvendosjes, kanë vazhduar dhe nuk kemi marrëveshje. Në mënyrë që të evitojmë zgjedhjet, kërkojmë më shumë kohë”, deklaroi Kurti, raporton korrespondentja e Top Channel në Prishtinë, Leonita Bajrami.
Pas fjalës së Kurtit, deputetja e Aleancës për Ardhmërinë e Kosovës, Time Kadriaj, është afruar dhe ka nisur të qëllojë me vezë në drejtim të kryetarit të Vetëvendosjes.
Situata është tensionuar më tej, teksa deputetët e grupeve të ndryshme politike janë ngritur në këmbë dhe kanë nisur shtyrjet fizike.
Për shkak të tensioneve në sallë, kryesuesi i seancës, Avni Dehari, ka vendosur ta ndërpresë atë.