Janë bllokuar në pistë të gjithë avionët në Shtetet e Bashkuara të Amerikës. Një keqfunksionim i një sistemi lajmërues për pilotët, i përdorur nga Administrata Federale e Aviacionit – FAA shkaktoi bllokimin e të gjitha fluturimeve, me pasoja të shumta për transportit ajror në botë.
Lajmi është konfirmuar nga mediat amerikane që e cilësuan situatën të paprecedentë.
Në një deklaratë për media, FAA pranoi se kishte një problem në sistemin e lajmërimit për iteneraret ajrore, e njohur ndryshe si Notam. Ky sistem përmban informacione shumë të rëndësishme për ata që merren me operacionet e fluturimeve. Sipas deklaratës teknikët vepruan menjëherë për të rivendosur sa më shpejt në funksion sistemin dhe për momentin nuk u dha një kohë që rifillimin e shërbimit.
Rreth orës 6.30 të bregut lindor të Shteteve të Bashkuara të Amerikës , 12.30 me orën tonë, faqja në internet e monitorimit të fluturimeve “FlightAware” sinjalizonte 760 avionë me vonesë brenda vendit, në dalje apo në ardhje, si dhe 91 anulime.
Në orën 13.30 u regjistruan 7.076 fluturime me vonesë, nga të cilat 1.230 në hyrje apo në dalje të Shteteve të Bashkuara të Amerikës. Fluturimet e anuluara në total janë 1.354, nga të cilat 99 hyrëse ose dalëse në SHBA.
Rreth orës 13.00, me orën tonë, FAA përditësoi në platformën sociale Twitter situatën duke sqaruar se po punohej ende për të riaktivizuar plotësisht sistemin e lajmërimit të fluturimeve ajrore. Por gjithashtu në mesazh shkruhej se ndërkohë që disa funksione po riktheheshin në linjë, operacionet e Sistemit Ajror Kombëtar mbeteshin ende të kufizuara.