I shumëkërkuari Taulant Manaj ka një histori të gjatë problemesh me ligjin.
29-vjeçari nga Vlora është person me precedentë penalë duke qenë anëtar i njërës prej bandave kriminale të Vlorës. Në 27 shkurt të vitit të kaluar ai u plagos pas një konflikti mes dy grupeve kriminale në zonën e Kishës Ortodokse.
Historia e tij ka tërhequr dhe vëmendjen e medias, pasi është nxjerrë nga burgu në dy raste. Pas kapjes në flagrancë me një sasi droge, pistoletë dhe me një sasi të konsiderueshme parash, gjyqtarja Herila Çela ndryshoi në mënyrë skandaloze në 6 gusht të 2018 masën nga ‘’arrest me burg’’ në ‘’arrest shtëpie’’ me arsyetimin se në pistoletën e gjetur nuk kishte gjurmë të gishtave të Taulant Manajt (i cili mban dhe mbiemrin Beqiraj) dhe se provat materiale nuk përbëjnë fakt që ai të dënohej me burg.
Në shtator, teksa Gjykata e Vlorës vendosi që ai të kthehej në burg, Manaj kishte arritur të arratisej.
Nxjerrja e tij nga burgu me vendim gjykate vuri në lëvizje Këshillin e Lartë të Drejtësisë duke kërkuar shkarkimin e gjyqtares Herila Çela.
Ai u arrestua sot pas një viti në Tiranë pas një operacioni të koordinuar.