Si kurrë më parë, Partia Demokratike është në pikëpyetje nëse do të regjistrohet në zgjedhje lokale të 14 Majit. Kryekomisioneri Ilirjan Celibashi do të shqyrtojë kërkesën e Partisë Demokratike, pasi Komisioni i Ankimimeve dhe Sanksioneve (KAS) nuk pranoi ankimimet e dy grupeve. Fati i PD-së së Alibeajt do të jetë sërish në dorën e Celibashit, pasi do të jetë ky i fundit që do përcaktojë nëse do futen apo jo në zgjedhjet vendore 2023.
Partia Demokratike rrezikon që të mos futet në zgjedhje, pasi edhe në vendimin e parë Celibashi vendosi kusht plotësimin e deklaratës solemne nga Lulzim Basha, i cili rezulton kryetar i PD-së në regjistrin e partive politike. Nga ana tjetër, grupi i Alibeajt thotë se nuk do e firmosë Basha pasi ky i fundit ka dhënë dorëheqjen dhe se sipas tyre dokumentacioni është i plotë.
Dje Sali Berisha tha se sot do të të komunikohen zhvillime të reja që lidhen me koalicionin që ai ka bërë me Ilir Metën, për zgjedhjet lokale të 14 Majit. Në një komunikim me mediat, Berisha pohoi se koalicioni i tij me Metën është tmerri i Edi Ramës.