Një ndihmës i afërt i demokratit, kandidat në zgjedhjet presidenciale të SHBA, Joe Biden ka zbuluar planet e tij nëse zgjidhet drejtues i SHBA.
“Një samit me udhëheqësin e Koresë së Veriut Kim Jong Un është në planet e menjëhershme të Biden nëse fiton zgjedhjet”, kështu ka deklaruar Brian McKeon, këshilltar i Biden, në një intervistë të dhënë së fundmi për agjencinë e lajmeve të Shtetit të Koresë së Jugut.
Sipas tij kandidati presidencial synon të arrijë denuklearizimin e Gadishullit Korean dhe të kërkojë një takim me Kim Jong Un, nëse fiton ndaj Donald Trump, në zgjedhjet e ardhshme më 3 nëntor.
“Biden e kupton që çështja e Koresë së Veriut është mjaft komplekse dhe nuk mund të zgjidhet përmes dy takimeve të kryetarëve të shteteve“, tha këshilltari presidencial demokrat, duke shtuar se Biden dhe Kim do të takoheshin nëse do të bëhej përparim në denuklearizimin e Gadishullit Korean.
Ndihmësi i ngushtë i Joe Biden ka zbuluar se kandidati demokrat për të bindur Kim Jong Un për të denuklearizuar Gadishullin Korean do të punojë ngushtë me aleatët e SHBA. Koreja e Jugut dhe Japonia dhe do të bashkëpunojnë me Kinën, pasi denuklearizimi është një qëllim i përbashkët i këtyre vendeve dhe do të sjellë paqe dhe prosperitet në rajon.