Kina po i jep fund karantinës së detyrueshme për ata që mbërrijnë në vend nga 8 janari, njoftuan sot autoritetet shëndetësore, pasi shumica e masave për trajtimin e Covid-19 që ishin në fuqi që nga viti 2020 janë hequr që nga fillimi i dhjetorit.
Nga muaji i ardhshëm udhëtarëve do t’u duhet vetëm një test negativ (brenda 48 orëve të fundit) për të hyrë në Kinë, tha Komisioni Shëndetësor. Kina është ekonomia e fundit e madhe në botë që vazhdon të karantinojë të ardhurit e rinj, edhe pse periudha e izolimit është zvogëluar muajt e fundit.
Sot udhëtarëve u kërkohet të qëndrojnë për 5 ditë në një hotel të ndjekur nga 3 ditë të tjera monitorim në shtëpi. Deri në qershor karantina ishte 10 ditë dhe më parë arrinte në 21. Komisioni Shëndetësor tha se nuk e konsideron më Covid-19 një “pneumoni” por një sëmundje “të transmetueshme”, më pak të rrezikshme.
Më herët sot, presidenti i vendit Xi Jinping urdhëroi autoritetet të “ndërtojnë një digë” dhe “të mbrojnë jetën” e njerëzve në Kinë pasi infeksionet u rritën pas heqjes së masave shëndetësore në 7 dhjetor.
Sipas AFP, ditët e fundit ka pasur një numër jashtëzakonisht të lartë trupash për t’u djegur. Mediat kineze, megjithatë, nuk i referohen këtij fakti. Spitalet janë plot dhe është e vështirë të gjesh ilaçe kundër gripit në farmaci, ndërkohë që vendi mëson të jetojë me virusin.
“Ne duhet të organizojmë një fushatë shëndetësore patriotike më të synuar dhe të ndërtojmë një mburojë solide kundër epidemisë,” tha Xi, pa elaboruar më tej, në deklaratën e transmetuar nga CCTV shtetërore.
Sipas vlerësimeve të disa studimeve perëndimore, heqja e kufizimeve mund të çojë në vdekjen e deri në 1 milion njerëz në muajt e ardhshëm. Të dielën, Pekini njoftoi se nuk do të publikojë më statistika për Covid-19. Deri vonë, testet PCR, të cilat ishin pothuajse të detyrueshme, lejonin që epidemia të monitorohej me njëfarë besueshmërie.
Por tani pacientët e bëjnë vetë testin në shtëpi dhe rrallë i informojnë autoritetet për rezultatet. Bazuar në raportin zyrtar, vetëm 6 vdekje nga Covid-19 janë regjistruar që nga heqja e masave, një numër që ekspertët besojnë se është shumë i nënvlerësuar.