Kina do të fillojë prodhimin e një vaksine të mundshme kundër Covid-19 e cila do të krijohet me qeliza të insekteve, thanë autoritetet lokale në qytetin jugperëndimor të Chengdus.
Në këtë mënyrë, Kina po tenton të zhvillojë vaksina me kosto efektive për të frenuar pandeminë.
Përdorimi i qelizave të insekteve për rritjen e proteinave për sa i përket vaksinës potenciale kundër virusit, mund të shpejtojë prodhimin në shkallë të gjerë, deklaruan autoritetet.
Vaksina e zhvilluar nga West China Hospital nga Universiteti i Sichuan, tashmë e ka marrë miratimin nga Administrata Kombëtare e Produkteve Mjekësore për të hyrë në prova klinike, shkruan Reuters.
Kur u testua tek majmunët, vaksina tregoi shenja pozitive për sa i përket parandalimit të infeksioneve nga SARS-CoV-2, madje nuk shfaqi edhe efekte anësore.
Shkencëtarët kinezë aktualisht janë duke punuar për të paktën tetë vaksina të tjera të mundshme anti-covid, të cilat kanë hyrë në faza të ndryshme testimi.