Abby Haliti, ose Arbëresha Haliti është shqiptarja me origjinë nga Shkupi që migroi në Amerikë në moshën 17-vjeçare dhe tashmë është më e kërkuara në New York dhe Hollywood.
Gjatë një interviste në emisionin e mëngjesit “Wake Up”, Abby ka rrëfyer rrugëtimin e saj të gjatë në fushën e estetikës.
Ajo shprehet se zanatin e ka marrë në Shkup që në moshën 13-vjeçare duke punuar si asistente. Ndërkohë që shkollën e zhvilloi në Amerikë, një shkollë, sipas saj, mjaft e vështirë dhe “kishte të bëntë me anatominë e njeriut”
“Mora liçencën në Amerikë dhe fillova punën në sallone të vogla, jo shumë të famshme; dhe më vonë më lindi rasti të merem me njerëz që janë më të njohurit në ekspozitën e flokëve.”– rrëfen ajo.
Haliti tregon se fillimet e saj nuk ishin të lehta, por tani emri i saj përmendet nga emra të njohur të kinematografisë dhe muzikës në botë.
Abby veçon punën që pati me Sigourney Weaver, Rita Orën, Fadil Berishën, e emra të tjerë të njohur në botë.
Pavarësisht se për të ka shkruar e përditshmja prestigjioze “New York Times” e deri tek revista “Vogue”, ajo nuk nguron të dhurojë intervista në media shqiptare.
Intervista me të në shqip është e një rëndësie të veçantë, pasi thotë se realizoi ëndrrën e prindërve të saj – ta shohin e ta dëgjojnë duke folur shqip në një media shqiptare.