“Këto janë kohë të errëta për kombin tonë”, kështu shprehet ish-presidenti i Shteteve të Bashkuara, Donald Trump, pasi bëri me dije se shtëpia e tij në Florida është bastisur nga FBI dhe se agjentët hapën një kasafortë. Trump deklaron se shtëpia në Mar-a-Lago në Palm Beach u pushtua për disa orë nga një grup i madh agjentësh të FBI.
Kontrolli thuhet se ka të bëjë me një hetim për mbajtjen e dokumenteve zyrtare nga zoti Trump. Mediat amerikane raportojnë se kontrolli lidhet me dokumentet që presidenti mund t’i ketë çuar në Mar-a-Lago pas largimit nga Shtëpia e Bardhë.
“Këto janë kohë të errëta për kombin tonë. Kam bashkëpunuar me të gjitha agjencitë përkatëse qeveritare dhe kështu që bastisja e paparalajmëruar në shtëpinë time nuk ishte e nevojshme apo e përshtatshme. Një sulm i tillë mund të ndodhë vetëm në vendet e shkatërruara, të botës së tretë. Mjerisht, Amerika tani është bërë një nga ato vende, të korruptuara në një nivel të paparë më parë”, u shpreh ish presidenti.