Kompania që menaxhon aeroportin e Rinasit, Tirana International Airport (TIA) thotë se nuk mund të pranojë akuzat e Ministrisë së Brendshme se grabitja e djeshme në këtë aeroport, ishte një skenar i përsëritur.
“Por, pasi ndoqëm me shqetësim deklaratën zyrtare të Ministrisë së Brendshme, duket se etika e TIA-s ka shërbyer për herë të dytë për një keqinformim të publikut dhe fajësimin – si skenar i përsëritur – për një akuzë të rëndë që nuk qëndron në shpatullat e një koncesionari të huaj, pa mënjanuar kërkesat e Kontratës së Koncesionit që TIA përmbush çdo ditë në lidhje me sigurinë aeroportuale”, thuhet në reagim.
Koncesionari thekson se ka qenë korrekte në përmbushje të detyrimeve dhe se janë shtuar masat e sigurisë. TIA thekson se ka vënë në dispozicion të autoriteteve hetimore të gjitha materialet dhe regjistrimet e kamerave të sigurisë që hedhin dritë mbi ngjarjen e 9 prillit 2019.
Më tej thuhet se “aeroporti nuk është i kinezëve, është i gjithë shqiptarëve. Është pjesë e territorit të Shqipërisë dhe mbrohet me ligj nga Policia e Shtetit si çdo metër i këtij vendi. Ndaj deklaratën zyrtare të Ministrisë së Brendshme e vlerësojmë si të pasaktë”.