Policia Kufitare e Sarandës ka vijuar kontrollet në hapësirën detare për parandalimin dhe goditjen e paligjshmërisë gjatë sezonit turistik, me fokus të veçantë mjetet lundruese turistike, skafet dhe jet ski-t.
Në kuadër të planit operacional të zhvilluar nga strukturat policore, kontrollet janë përqendruar në zonën detare nga Qeparoi deri në Katoet, ku gjatë këtij sezoni operojnë rreth 350 mjete lundruese turistike aktive.
Gjatë verifikimeve të kryera deri më tani, Policia Kufitare ka evidentuar një sërë shkeljesh dhe ka vendosur 20 masa administrative, me vlera të ndryshme në varësi të problematikave të konstatuara.
Shkeljet lidhen kryesisht me mosmbajtjen e dokumentacionit të mjetit në bord, mungesën e jelekëve të shpëtimit për udhëtarët, si dhe mungesën e pajisjeve të ndihmës së shpejtë dhe elementëve të tjerë të detyrueshëm të sigurisë.
Në operacion janë angazhuar 7 mjete lundruese të Policisë Kufitare, përfshirë skafe dhe jet ski, si dhe 32 efektivë shtesë, përveç forcave të angazhuara në shërbimet e përditshme.
Policia Kufitare bën me dije se kontrollet do të vijojnë përgjatë gjithë sezonit turistik, me qëllim garantimin e sigurisë në det dhe respektimin e rregullave nga përdoruesit e mjeteve lundruese.