Ulja e temperaturave ka sjellë sërish reshje bore në Korçë dhe në fshatin turistik të Dardhës. Velloja e bardhë që ka mbuluar këtë zonë turistike pritet që të çojë turistë që duan të kalojnë fundjavën ndryshe.
Deri më tani nuk raportohen problematika në qarkullimin e mjeteve, ku në zonat në të cilën kishte prezencë të reshjeve është bërë kriposja dhe pastrimi i rrugëve. Rrugët janë të hapura për kalimin e mjeteve pa zinxhirë dhe pa problematika. Në aksin rrugor Korçë-Panarit trashësia e borës ka shkuar deri në 4 cm, pasi reshjet kanë qenë me intensitet të ulët dhe kalimi bëhet lirshëm, por në disa zona rekomandohen zinxhirët.
Gjithashtu në rrugën Lekas-Voskopojë bora ka shkuar në 3 cm, nuk ka bllokim dhe banorët kanë lëvizur lirshëm mëngjesin e sotëm. Rrugët e fshatrave paraqiten totalisht të hapura dhe pa probleme. Bashkia Korçë në rrugët që ka në administrim, ka hedhur kripë gjatë orëve të natës për të shmangur bllokimet në akset më problematike.