Klodian Hasimllari, burri i cili gjeti një foshnje të pajetë në banesën e tij në Korçë ka dhënë sot dëshminë e tij për ngjarjen. Ai është paraqitur në komisariatin e policisë së Korçës rreth orës 02:00 të mëngjesit të sotëm.
Ai ka treguar i tronditur para efektivëve të policisë se trupin e foshnjës e gjeti pas aromës së rëndë që po vinte në shtëpi dhe ajo ishte thuajse të dekompozuar tërësisht.
“Më duket se pashë një foshnjë në valixhe në shtëpi. Më vinte erë e keqe nga dhoma e gjumit, shkova kontrollova në dollapin e rrobave dhe pashë në valixhe një fëmijë. Unë kam më tepër se 1 vit që shkoj e vij nga Greqia sepse mundohem të mbaj familjen me bukë. Isha në Korçë para 5 muajsh, prandaj s’jam i sigurt nëse foshnja është e imja apo jo. Kisha 5 muaj pa ardhur në Korçë. Pyesja gruan po ajo më fliste në vetën e tretë duke përmendur emrin e saj pa e ditur që po fliste për veten. Thoshte që “M…” (emri shkurt i 40-vjeçares) ka lindur fëmijë dhe e ka futur në valixhe. Jam shumë i tronditur nga ajo që pashë.”
Ndërkohë, burime konfidenciale bëjnë me dije se babai ka qenë para 1 muaji në Korçë pasi 40-vjeçarja ka qenë e sëmurë. Klodian Hasimllari ka ardhur për ta parë pasi e shoqja kishte pasur anemi të theksuar. Konfirmohet se foshnja ka lindur para kohe dhe që s’ka qenë i formuar plotësisht.