Ndërsa punimet për Lotin e Parë dhe të Dytë të rrugës Elbasan-Qafë Thanë po ecin me rritmë të larta, Autoriteti Rrugor Shqiptar ka shpallur kompanitë fituese për fazën 3 dhe 4 të këtij aksi të rëndësishëm që është pjesë e Korridorit 8.
Për Lotin 3 të rrugës punimet do të zbatohet nga kompania 2 T që është përzgjedhur me një ofertë prej 2.11 mld Lekë, nga 2.5 mld Lekë që ishte fondi limit i vënë në dispozicion.
Ndërkohë që, për Lotin 4, fituese është shpallur kompania A.N.K me një ofertë prej 2.08 mld Lekë, teksa fondi limit edhe për këtë segment ishte 2.5 mld Lekë. Së bashku me këto procedura, ARRSH ka përmbyllur tenderët për 4 lote të këtij aksi rrugor.
Në fazë më pak të avancuar për këtë segment është pjesa nga Bushtrica deri në pikën e re doganore me Maqedoninë e Veriut që aktualisht është në fazë projektimi.
Fituesi i tenderit u shpall pak javë më parë, ndërkohë që projekti i zbatimit do të jetë gati pas më shumë se 18 muajsh. Vetëm pasi ai të jetë gati do të mund të kryhen procedurat tenderuese për ndërtimin e tij.
Paralelisht është duke u projektuar Bypassi i Elbasanit, që sipas afateve kontraktuale duhet të jetë gati në vitin 2024.
Aksi Elbasan-Qafë Thanë, do të kthehet në një rrugë interurbane me katër korsi dhe ai do t’iu vijë në ndihmë Elbasanit dhe Korçës për zhvillimin e turizmit duke shkurtuar ndjeshëm distancën kohore të udhëtimit.
Gjithashtu ai do të afrojë edhe më shumë Shqipërinë me Maqedoninë e Veriut.