Kosova mbetet në vendnumërim, sa i përket rrugës drejt Bashkimit Europian. Vendi ka nënshkruar vetëm Marrëveshjen e Stabilizim-Asociimi me BE-në, që është hapi i parë drejt anëtarësimit në bllok. E ardhmja evropiane i është konfirmuar disa herë, por rezultate të vërejtshme në praktikë nuk ka pasur.
“Rrugën e Kosovës drejt Evropës e ka penguar më së shumti korrupsioni dhe nepotizmi në punësime. Po të mos ishte hajnia, Kosova do të mund të përparonte dyfish më shumë”, thotë Osman Maliqi, një qytetar nga Prishtina. “Nëse vazhdohet kështu, Kosova mund të anëtarësohet në BE në vitin 2050”.
Anëtarësimi në BE është një proces tejet kompleks dhe me vite i gjatë. Për të mbërritur atje, duhen bërë disa hapa dhe kaluar disa faza si: kërkesa për anëtarësim në BE, rekomandimi për statusin e kandidatit, statusi i kandidatit, nisja e negociatave për anëtarësim, përfundimi i negociatave dhe ratifikimi i traktatit të anëtarësimit.