Komisioneri Shtetëror i Zgjedhjeve, Ilirjan Celibashi shpjegoi këtë të mërkurë pas mbledhjes, mungesën e një vendimmarrje lidhur me listat e paraqitura nga PD për anëtarë të KZAZ-ve, për zgjedhjet lokale të 14 majit. Sipas Celibashit, vendimmarrja e KQZ-së do të jetë strikte, e bazuar në Kodin Zgjedhor dhe se e presin PD-në deri më 7 mars.
“Ajo çfarë ka determinuar më shumë është fakti që ne jemi në këtë situatë, vendimmarrja e KQZ do të jetë strikt, bazuar në Kodin Zgjedhor. Mbetet e padiskutueshme që në momentin që do të vendosim për këtë, kjo vendimmarrje do të jetë në përputhje me parashikimet e ligjit. Do të jetë vendimmarrje shumë e thjeshtë. Nuk kam asnjë problemi, droje apo sikleti për ta marrë këtë vendim. Është vendimi më i thjeshtë që mund të merret për regjistrimin e një subjekti zgjedhor. KZAZ-të do të fillojnë të punojnë sepse është kuorumi prej 4 anëtarësh. Në momentin më të përshtatshëm do të emërojmë edhe anëtarët e KZAZ-së të propozuar nga Partia Demokratike. Nëse nesër do të kemi një kërkesë për regjistrimin e PD, do ta shqyrtojmë dhe do të marrim vendimin. Në interes të të gjithëve për të pasur zgjedhje, do duhet të vendosim për disa çështje”.
PS-ja do të propozojë dy anëtarë për çdo KZAZ si partia më e madhe e mazhoranancës dhe Partia Demokratike dy anëtarë si partia më e madhe e opozitës. Partia Socialdemokrate si partia e dytë e mazhorancës dhe Partia e Lirisë si partia e dytë e opozitës do të kenë nga 1 anëtar në çdo KZAZ. Anëtari i shtatë do të vendoset mes Partisë Socialiste dhe Partisë Demokratike. Sekretari do të propozohet nga PS-ja aty ku PD-ja ka propozuar zëvendës kryetarin, dhe e anasjellta.