Dmitry Peskov ka lënë të hapur mundësinë për të vendosur për ekzekutimin e dy ushtarëve amerikanë të kapur në Ukrainë nga forcat rebele në rajonin e Donetsk.
“Po flasim për mercenarë që kërcënuan jetën e ushtarëve tanë. Dhe jo vetëm tanët, por edhe ushtarët e Republikës Popullore të Donetskut dhe Republikës Popullore të Luhanskut. Ata janë duke u fajësuar për këtë”, u tha Peskov gazetarëve në Moskë.
Zëdhënësi i Kremlinit kujtoi se kushtet e Konventës së Gjenevës për të burgosurit e luftës nuk vlejnë për mercenarët. Fati i të burgosurve do të vendoset nga një gjykatë e Republikës së vetëshpallur Popullore të Donetsk-ut, shtoi ai.
“Nuk mund të përjashtojmë asgjë, përfshirë dënimin me vdekje, sepse është një vendim gjykate. Ne kurrë nuk i komentojmë ato dhe përveç kësaj nuk kemi të drejtë të ndërhyjmë në vendimet e gjykatës” , tha Peskov.
Javën e kaluar, mediat britanike raportuan se dy amerikanë ishin arrestuar pranë Kharkivit. Rusia nuk i ka konfirmuar apo mohuar akuzat.
I pyetur nëse Kievi kishte kontaktuar Moskën për të rifilluar bisedimet e paqes pas takimit të Zelensky me kancelarin gjerman Olaf Scholz dhe presidentin francez Emanuel Macron, Peskov tha jo. “Jo, nuk ka pasur përpjekje për të rifilluar bisedimet”, tha ai.