Qytetarët në Kosovë kanë dalë sot në protestë pas krimit që tronditi ditën e djeshme Prishtinën, ku një 35-vjeçare, e cila ishte në pritje të ëmbël, u qëllua për vdekje nga ish-bashkëshorti i saj.
Një numër i konsiderueshëm njerëzish janë mbledhur në sheshin “Zahir Pajaziti”, teksa kërkohet që “vrasja e grave nga burrat të trajtohet si urgjencë kombëtare”.
“Jeta e gruas e vlefshme pavarësisht a është nanë, motër, bijë!”; “Hapësirat private e publike të pasigurta për gratë!”; “Historinë e Kosovës po e shkruani me gjak të grave!”, ishin këto disa nga pankartat që shiheshin në protestë.
Sokol Halili dhe Hamide Magashi kishin më pak se një vit të martuar bashkë dhe po prisnin fëmijën e tyre të parë. Por, martesa e tyre kishte probleme dhe Magashi kishte kërkuar divorcin.