Kina, Rusia dhe Irani mbështesin, Nicolas Maduron si President të Venezuelës dhe i kanë bërë thirrje SHBA-së të mos përfshihet në trazirat që po ndodhin në atë vend.
Deklaratat u bënë pasi Ëashington njohu liderin e opozitës, Juan Guaido, si president të përkohshëm. Dje, Guaido e shpalli veten president gjatë protestave masive antiqeveritare.
SHBA tha se “ish-presidenti Maduro” nuk ka më autoritet dhe i bëri thirrje ushtrisë që të mbështesë Guaidon.
Ndërkaq, Kina i ka bërë sot thirrje Shteteve të Bashkuara të mos përfshihen në krizën në Venezuelë. Zëdhënësja e Ministrisë së Punëve të Jashtme, Hua Çunjing tha se të gjitha palët në konflikt duhet të mbesin “racional dhe të qetë” si dhe të kërkojnë zgjidhje politike.
Kina i ka dhuruar Venezuelës 65 miliardë dollarë në 10 vitet e fundit, nëpërmjet huadhënies, depozitave dhe investimeve.
Po ashtru edhe Irani njoftoi se mbështet presidentin, Nicolas Maduro dhe akuzoi opozitën për goditje shtetërore dhe përpjekje për marrjen e pushtetit në mënyrë të paligjshme.
Nga ana tjetër edhe Rusia ka paralajmëruar Shtetet e Bashkuara që të mos ndërhyjnë ushtarakisht në Venezuelë, duke pretenduar se një veprim i tillë do të shkaktonte një skenar katastrofik.