Në tri mbledhje radhazi, të njëjtat akuza ndaj kryebashkiakes së Prrenjasit, Miranda Rira. Grupi i këshilltarëve socialistë, nuk lëshojnë “pe” nga akuzat e tyre. Bashkia ka mbetur me arkën bosh. Socialistët kanë bllokuar miratimin e buxhetit për këtë vit.
Sipas këshilltarëve socialistë, akuza e parë lidhet me 450 milion lekë fatura të palikujduara. Sipas tyre, janë 45 milion lekë fatura ta palikujduara, për shkak të limitit, që vendosi ministria e Financave. Akuza e dytë lidhet me 380 milion lekë investime të prapambetura pa asnjë objekt të projektuar për investime. Akuza e tretë lidhet direkt me mosvotimin për buxhetin. Këshilltarët socialistë vërejnë, se aty kishte 65 milion lekë për blerje nafte për makinën e Kryetares. Ndërsa Rira ka shpjeguar, se blerje nafte është 6.5 milion lekë për fadromat, kamionin, eskavatorin, kamioçinën, 3 fuoristradat dhe makinën që ka administrata. Kryetarja nuk ka makinë, por nafta është për të gjitha mjetet e Bashkisë. Akuza e katërt lidhet me atë, që Bashkia kishte lënë vetëm 7 milion lekë për arsimin parashkollor. Akuza e pestë për fondin social, që sipas këshilltarëve në fjalë, ishte shumë i ulët dhe duhet të ishte dyfishin e vjetshëm. Akuza e gjashtë lidhet me ndriçimin “led”. Është konsideruar abuzim, sepse do shpenzohen 180.000 euro vetëm për ndryshim llampash!
Ndërkohë, kryebashkiakja, Miranda Rira i ka hedhur poshtë të gjitha akuzat, duke dhënë argumnetet e veta. Sidqofotë, Bashkia e Prrenjasit mbetet e vetme, që nuk ka buxhet për vitin 2019. Dëmi bie mbi qytetarët. Sa për paga dhe pagesën e energjisë elektrike, ka hapsira ligjore. Dy ditë më parë Rira i është drejtuar me një shkresë zyrtare Kryeministrit Rama duke i kërkuar që Qeveria të vendosë shpërndarjen e këshillit bashkiak.