Kryetari i Prishtinës, Përparim Rama, në konferencën për media ka dhënë disa detaje shtesë rreth zhvendosjes së “Sunny Hill” në Tiranë.
Fillimisht, ai fajësoi qeverinë për shkak të zvarritjes në dhënien e pronës së kërkuar.
Më tej, Rama u shpreh që “Sunny Hill” i takon Kosovës, Prishtinës dhe të rinjve në vend.
“Siç e keni kuptuar këto ditë Sunny Hill Festival nuk do të mbahet në Prishtinë, ky është një lajm dëshpërues për kryeqytetin si dhe për gjithë Kosovën. Sunny Hill Festival i takon Kosovës, i takon Prishtinës, të rinjve dhe të rejave tona që me padurim e kanë pritur edicionin e sivjetmë”, tha ai.
Sakaq, Rama beson se nga viti tjetër ky festival do të kthehet sërish në Prishtinë, aty ku edhe e ka vendin.
“Kam besimin e plotë se festivali Sunny Hill nga viti tjetër e tutje do të jetë në shtëpinë e vetë në Prishtinë, pra këtu edhe ku e ka vendin”, deklaroi Rama.