Klub Sport Burreli ka reaguar mbi një ngjarje të ndodhur në emisionin e sportit “Supergol” në “RTSH” të drejtuar nga moderatorja Hygerta Sako. Teksa lojtari i Burrelit, Arnold Siaw po priste në lidhje direkte pas ndeshjes ndaj Pogradecit ku ai ishte autori i një goli, Sako si dhe të ftuarit në emision qeshën me emrin e lojtarit. Burreli ka reaguar duke i cilësuar komentet si të “papërshtatshme” dhe me “nuanca raciste”. Gerd Haxhiu, një nga të ftuarit shkon më tej duke thënë: ”Falenderojmë RTSH-në që në fund na e zbuloi, se dukej si personazh që nuk donte të shprehej”.
Reagimi i plotë
Faqja Klubi Sportiv Burreli shpreh indinjatën e tij të thellë për komentet e papërshtatshme dhe me nuanca raciste të bëra në një emision sportiv të transmetuar në RTSH, në adresë të futbollistit tonë Arnold Siaw.
Një gjuhë e tillë, pavarësisht nëse maskohet si “shaka”, nuk ka vend as në sport dhe as në shoqërinë tonë. Futbolli është një lojë që bashkon njerëzit, pa dallim ngjyre, race apo origjine, dhe çdo lloj nënvlerësimi ndaj një sportisti për arsye të tilla është e papranueshme.
Arnold Siaw është pjesë e familjes sonë dhe ka fituar respektin e të gjithë tifozëve e qytetit tonë me karakterin, përkushtimin dhe kontributin e tij në fushë.
Ne presim që RTSH dhe drejtuesit e emisionit në fjalë të marrin përgjegjësinë e duhur dhe të kërkojnë falje publike ndaj lojtarit dhe klubit tonë. Respekti dhe dinjiteti i çdo sportisti duhet të mbrohet pa kompromis.