Skuadra e Kukësit do të luajë ditën e nesërme në një transfertë delikate përballë Laçit. Pas shkarkimit të trajnerit Ndreu, pas disfatës në ndeshjen e fundit ndaj Kastriotit, në këtë përballje për kuksianët do të debutojë trajneri i sapoemëruar Ernest Gjoka.
Një rikthim ky për Gjokën në krye të Kukësit, skuadër me të cilën fitoi titullin historik në vitin 2017. Megjithatë, do të jetë një debutim me jo pak probleme për teknikun 49-vjeçar, pasi përveç kundërshtarit të fortë, do t’i duhet të bëjë llogaritë edhe me mungesat në organikën e skuadrës. Kështu, pas dëmtimit që mori ndaj Kastriotit, mbrojtësi Gëzim Krasniqi ka mbyllur përfundimisht sezonin, pasi ka pësuar një këputje të tendinës.
Ndërkohë në dyshim për sfidën e nesërme mbetet dhe mesfushori, Irakli Zharia. Gjeorgjiani ka probleme shëndetësore dhe duket se nuk do t’ia dalë të jetë i gatshëm. Ndërkohë, Kukësi mbetet 9 pikë larg kryesuesve të kampionatit, teksa do të kërkojë të shmangë hapat fals edhe pse mungesat do t’ia vështirësojnë debutimin, trajnerit Ernest Gjoka