Bes Kallaku, aktori i njohur i humorit është bërë baba në korrik të vitit të shkuar, dhe muajin e ardhshëm feston përvjetorin e parë të Ajkës. Por nuk është aq e lehtë të jesh baba, sa ndonjëherë do të të duhet “të thyesh qafën” për të bërë atë që duhet për ta.
Kështu ka ndodhur me Besin, i cili ka postuar një video në Instagram, teksa ka qenë duke rregulluar bagazhin e makinës në një lavazh. Në një moment një lodër e Ajkës i bie nga makina dhe Besi mundohet ta kapë, por për shkak të dyshemesë së lagur rrëshket në ujë. Të pranishmit duket që nuk e mbajnë dot të qeshurin, megjithëse Besi edhe mund të jetë vrarë pak.
“Kur bien lodrat e Ajkës nga makina edhe baba do me i kap si futbollist”, shkruan Besi në përshkrimin e videos. Nuk mungon as komenti i bashkëshortes së tij, këngëtares Xhensila Myrtezai. “Mraftë pika”, i shkruan ajo shoqëruar me një emoji të majmunit që mbyll sytë.