Kryeministri Albin Kurti, Ministrja e Punëve të Jashtme dhe Diasporës, Donika Gërvalla, deputetë të shumtë të Kuvendit të Kosovës si dhe përfaqësues të Shoqërisë Civile morën pjesë në hapjen e tryezës “Tryeza e rrumbullakët mbi të drejtat e diasporës”.
Në fjalën e tij, kryeministri Kurti theksoi se remitancat e diasporës në Kosovë brenda një viti shkojnë deri mbi 1.4 miliardë euro.
Sipas Kurtit, kjo dëshmon se mërgata luan një rol themelor në zhvillimin e vendit. “Jemi duke punuar që diasporën ta angazhojmë në disa mënyra. Po ashtu, diaspora mund të kontribuojë në ndërmarrje, lidhje tregtare, që ndikojnë në rritjen e potencialit të vendit tonë”, tha Kurti.
Kryeministri shtoi gjithashtu se Qeveria po punon vazhdimisht që të krijojë të gjitha kushtet që krahas investimit në atdhe, mërgata të sjellë po ashtu edhe dije.