Kryeministri i Kosovës, Albin Kurti ka folur në mbledhjen e qeverisë për masat që Komisioni Evropian i ka paraqitur pas tensioneve në veri. Kurti ka thënë se me raste kanë qenë kritikë, por jo të hidhëruar ose cinik me BE-në. Po ashtu tha se e ardhmja e Kosovës është drejt BE-së, pavarësisht zhvillimeve rrethanore.
“Më lejoni të adresoj një zhvillim të fundit. Komisioni Evropian dje ka paraqitur para Bashkimit Evropian një listë të masave kundër Kosovës. Bashkimi Evropian te Kosova e gjen partnerin e aleatin më të sinqertë e të qëndrueshëm në rajon të vlerave evropiane, parimeve demokratike e interesave afatgjate.
Kosova të tillë e ka qeverinë, popullin. Së pari popullin e pastaj qeverinë. Me raste kemi qenë kritikë ndaj Bashkimit Evropian, por asnjëherë as cinik e as të hidhëruar. Nuk jemi as sot, kur në dhjetor dorëzuam aplikacionin tonë për anëtarësim, besuam që në të ardhmen e parashikueshme të jemi pjesë e këtij unioni”, tha Kurti.