Kryeministri i Kosovës, Albin Kurti, kishte rënë pre e një thirrjeje me video nga dy humoristë rusë pak pas zgjedhjeve parlamentare të 9 shkurtit në Kosovë. Dy humoristët rusë, Vladimir Kuznetsov dhe Alexei Stolyarov, publikuan një video të bisedës me kryeministrin Albin Kurti.
Kjo duke pretenduar se po flisnin në emër të presidentit të Letonisë, Edgar Rinkevics. Zëdhënësi i Qeverisë së Kosovës, Përparim Kryeziu, tha se “ky incident” ndodhi më 11 shkurt.
Ai e arsyetoi rënien e kryeministrit pre e mashtrimit duke thënë se gjatë asaj kohe, Kurti po merrte telefonata të shumta urimi. Kjo pasi partia e tij, Lëvizja Vetëvendosje, doli e para në zgjedhje. “Për shkak të kohës së kufizuar, nuk ka qenë gjithmonë e mundur të kryheshin verifikime të thella të çdo thirrjeje”, tha Kryeziu.
Në video, Kurti i pranon urimet e dy humoristëve rusë që shtiren se po flasin në emër të presidentit Rinkevics dhe flet me ta për një sërë çështjes. Kjo përfshirë zgjedhjet, dialogun me Serbinë, të dërguarin e Trumpit për misione të veçanta, Richard Grenell, luftën hibride e çështje të tjera. Publikimi i kësaj videoje ka ngjallur shumë reagime në vend.