Daniel Muka akuzohet për një vrasje të dyfishtë të ndodhur në Sliema të Maltës.
Gjykata tha të mërkurën se shqyrtoi disa faktorë përpara se të refuzonte kërkesën për lirim me kusht nga shqiptari Daniel Muka.
27-vjeçari është një nga tre të arrestuarit për vrasjen e Christian Pandolfino dhe Ivor Maciejoëski, krim ky i ndodhur në shtëpinë e tyre në Locker Street më 18 Gusht 2020.
Hetuesit besojnë se ngjarja ndodhi gjatë një tentative grabitjeje. Muka u arrestua disa ditë më vonë, ndërsa hetuesit kanë ndarë proceset për dy të arrestuarit e tjerë maqedonasi Viktor Dragomanski dhe danezi Jesper Kristiansen.
Sipas mediave vendase, kërkesa e Mukës për lirim me kusht u depozitua nga avokatët Alfred Abela dhe Rene ‘Darmanin, të cilët sollën gjithashtu dy dëshmitarë të cilët u shprehën të gatshëm t’i ofronin të akuzuarit strehim dhe punësim.
Gjykatësi Aaron Bugeja renditi faktorë të ndryshëm për refuzimin e lirimit me kusht, përfshirë natyrën e akuzave dhe rrethanat e veçanta të çështjes.
Ai shpjegoi se kur kërkohet të arrihet një ekuilibër mes interesave të shtetit, viktimave dhe të akuzuarve, gjykata duhet të marrë parasysh edhe dënimin e mundshëm që në këtë rast mund të jetë burgim i përjetshëm.
Prokuroria vuri në dukje rrezikun e arratisjes së Mukës nga Malta, si dhe karakterin dhe dosjen kriminale të të akuzuarit. Muka po ashtu dështoi që të paraqiste dikë që të ndërhynte si garant personal, vuri në dukje gjykata.
Në fund gjykata nuk ishte e bindur se i akuzuari mund të ofronte garanci të mjaftueshme për t’iu përmbajtur kushteve të lirimit me kusht.