Kuvendi i Shqipërisë ka miratuar sot emërimin e Gentian Salës si Kryetar të Këshillit Drejtues të Autoritetit të Komunikimeve Elektronike dhe Postare, me 73 vota pro. Ai zëvendëson Tomi Frashërin, mandati i të cilit përfundoi në dhjetor 2024.
Gjithashtu, u votua edhe projektvendimi për emërimin e Saimir Tolës si anëtar i Bordit të Autoritetit të Mbikëqyrjes Financiare, ku ai do të mbajë funksionin e Kryetarit të Bordit, me 72 vota pro, 1 kundër dhe 1 abstenim.
Gentian Sala u propozua nga Këshilli i Ministrave muajin e kaluar. Ai ka një karrierë të gjatë në fushën e medias dhe komunikimeve, duke mbajtur më parë postin e Kryetarit të Autoritetit të Medias Audiovizive (AMA) nga viti 2014 deri në 2019. Së fundmi, prej vitit 2021, ka drejtuar Sekretariatin për koordinimin e marrëdhënieve mes Shqipërisë dhe Kosovës. Me profesion jurist dhe me titullin avokat, Sala do të udhëheqë AKEP-in për një mandat pesëvjeçar, me mundësi rizgjedhjeje vetëm një herë.