Përdorimi i vajit të ullirit në vend të margarinës, gjalpit ose yndyrave të tjera të ngopura mund t’ju mbrojë nga vdekja e shkaktuar nga kanceri, sëmundjet kardiovaskulare dhe të frymëmarrjes, demenca dhe sëmundje të tjera, sipas një studimi të publikuar të hënën.
“Është një kombinim i uljes së sasisë së yndyrës së ngopur në të njëjtën kohë që po rrit yndyrnat e pangopura që gjenden në vajin e ullirit”, tha Dr. Howard LeWine, kryeredaktori mjekësor i Harvard Health Publishing, pjesë e Shkollës Mjekësore të Harvardit.
Sekreti është të përdorni vaj ulliri sa herë që mundeni si një zëvendësues për yndyrnat e ngopura kur gatuani ose në salcat tuaja të sallatës.
Studimi analizoi dietat e njerëzve të regjistruar në dy studime të mëdha të financuara nga qeveria: Studimi i Shëndetit të Infermierëve dhe Studimi Pasues i Profesionistëve Shëndetësor. Studiuesit më pas krahasuan gjetjet e dietës me të dhënat e sëmundjeve dhe vdekjeve për ata njerëz me kalimin e kohës.
Burrat dhe gratë që zëvendësuan pak më shumë se 2 lugë çaji (10 gram) margarinë, gjalpë, majonezë ose yndyrë qumështi me të njëjtën sasi vaj ulliri kishin një rrezik të përgjithshëm deri në 34% më të ulët për të vdekur sesa njerëzit që hanin pak ose aspak vaj ulliri.
Njerëzit që raportuan se e konsumonin në nivele të larta vajin e ullirit, kishin një rrezik 19% më të ulët për të vdekur nga sëmundjet e zemrës, një rrezik 17% më të ulët për të vdekur nga kanceri, një rrezik 29% më të ulët për të vdekur nga sëmundjet neurodegjenerative dhe një rrezik 18% më të ulët për të humbur jetën nga sëmundjet e frymëmarrjes krahasuar me ata që nuk konsumuan kurrë ose rrallë vaj ulliri në vend të yndyrave të ngopura, thotë studimi.